Friday, December 14, 2020

Sifac: Mutan Ahkisus Uh Pihlesru Sap Lal Pharoa

Mwe Read: Exodus 1:15-22

Kunokon 
By LM Driskell Jack

Tuesday, July 21, 2015
Sifac: Sheep Nutik Uh Fahsrelik
Mwe Read: Ezekiel 34:1-6

Greetings to you All!,
Ngan eis pacl uh in kaksakin GOD Fulat lasr meet liki ma nukewa ma kut finsrakin kut in akfahsrye ke len misenge uh. In sifwil ahkuhlen lupan ‘lung-kulang ac pakoten’ lun GOD Papa Tumasr; lac tia ke ma mwo kut kais sie orella, uh mah tuku ke lupan LUNGSE kawil Lal nu sesr nukewa. Lungse kawil lun GOD Papa Tumasr pac pa pwenang kut kuh in macno in wi ahkuhlen ke len lun Mwet lasr Utwe ke wik misenge uh.
Mwet lasr Utwe tu luhkun fahsrelik kuh luhkun suhn pac ouiyac uhpac liki uhpac, tusruktu, GOD Papa Tumasr El arulana pakoten in kacsru Mwet lasr. Pa pac kut ahkuhlen ke sie mwe lutlut na mwowo nu sesr ke len misenge uh. Ke sripen lungse yok lun GOD Papa Tumasr nu sin tulik natul ma tu som Juda ac muta in srouh fihn an Babylon ke lusen yeac itngaoul; elos tuh arulana nukacnulosla pac ke sripen ma uhpac ma sik nu selos ke koluk lun Mwet kol lalos. Tu ke sripen lungkulang ac packoten lun GOD Papa Tumasr, pwenang El tuhlohkonak sie Mwet in ehkin sie wal lun Mwet Tol fulat ac ouyapc Mwel Palu. Pa kut lutlut kac ke mwet se pangpang Ezekiel.
Ezekiel el sie Mwet na yok lulalfongi la sin GOD Papa Tumasr. Pacl se ma el oru palu lal, GOD Papa El akkalemye nu sel la pa inge sie pacl na uhpac ma tulik natul tuhlac ac sracngacsr lohngkas. Ouiyac se meet ma Ezekiel el orekmakin ke palu lal pa orekmakinyen (vision); in srumon ma uh nu sin mwet uh ke sramsram in srohlacla sie petsa in kalem ke ma el sramsram kac. Ak luo, El orekmakin ku ma GOD Papa El ahsang nu sel in muta ke ma suwos, efin nwe uhpac ma sik yehmutal. Ak tolu, in sramsram suwos nu sin mwet uh in lohng ke ma sapkinyuk, efin nwe uhpac insiyalos, kut kehkehkacwaclos. Pa kalem ke mwe read se ke Ezekiel 2:5, su fahk ouinge, “Elos finne lohng kom ku tia, elos ac etu lah oasr sie mwet palu muta inmasrlolos.”
Ezekiel el tu sie sin Mwet palu fwin an Jerusalem ke yeac (586 BC), meet-liki isusla lun Leum. Sramsram yok ke palu lal Ezekiel; ma nu selos mwet Jews (ku tulik nutin GOD) ma wi muta in sruoh in an Babylon ac ouyapac selos ma srak oasr fwin an Jerusalem. Sramsram ke Mwet Palu Ezikiel, el oana sramsram ma kut lutlut kac kel Mwet Palu Jeremiah. Elos pa luo sin Mwet Palu ma ehkin pac wal lun Mwet Tol Fulat (High Priest). Fahk in Ezikiel 1:1, la “Ke len aklimekosr in malem akakosr in yac aktolngoul, nga Ezekiel, sie mwet tol, wen natul Buzi, wi mwet Jew ma sruoh su muta sisken Infacl Chebar in ac Babylonia. Kusrao ikakla ac nga liye sie aruruma ke God.” Ezekiel el yeac 30 mahtwac ke el tuhlokyak yurin GOD Papa in sie sin Mwet Palu nu sin Mwet Jews suh muta in sruoh fihn an Babylon, a ouyapac oasr selos srak oasr fihn an Jerusalem. Pa kalem ke pacl lal Ezekiel, mwet palu ke yeac ma el oru palu lal (586 BC ); el kaclwehni nu sin mwet Jews ke lusen yeac onkosr la elos fihn tia oru ma lungse lun GOD Papa, elos ac suhn ohngaiya.
Mwe pakomuta ngan tahfu la elos putatyang nu ke ohngaiya ke sripen ma koluk lalos. Na pa mwe nunak se nu sesr misenge, Tuesday, July 21, 2015, akkalemye la saflaiyac, tulik nutin GOD ke srouh se inge fahsrelik. Kutu selos muta Jerusalem, kutu uhtukla nu Babylon ac kutu selos waclik kais sie an wehan Juda ac Samaria. Pa inge kacnon mwe lutlut nu sesr misenge. Pa akkalemyeyuk ke Ezekiel 34:1-6. (Nunak munas liye kais sie pohlo ahkuhteyac ke kais sie fus ke mwe lutlut se inge.)
Fahk in Ezekiel 34:1-6, Mwet Palu Ezekiel el sramsram nu sin tulik nutin GOD nukewa, kutu muta fwin an Samaria ac kutu fwin an Juda. Mwe fahk lal ke pohlo sramsram se inge uh, ma nu selos ma ehkin Mwet Kol ke muhtunfal luo Samaria ac Judah. Oasr ahkuhlen lal Ezekiel muh tulik nutin GOD elos fahsrelik ke sripen koluk karinginyelos sin Mwet Kol lalos. Ezekiel el akkalemye la orekma lun Mwet Kol lalos inge elos tiana sahokla enenu lun mwet ma elos kol kuh karingin. El akkalemye la orekma lun Mwet kol inge, elos ahkulen enenu lalos sifacna, ah mwet ma elos enenu in kacsru, tiana kohnweyukyak kacsru ma elos suk.
(34:1): In Ezekiel 34, fus se; GOD Papa el sramsram nu sel Mwet Palu Ezekiel. Fus se inge akkalemye la GOD Papa el sramsram nu sel Ezekilel ke sripen yok lulalfongi lal ac ouiye sel orekma lal. Kut etu la Mwet nukewa ma suhn ouiyac se inge, arulana eis insewowo la GOD Papa Tumasr el ahkuhlenos in sang konokon na uhtuftuf nu selos. Fuhkac mwolanaiyac in sik ouiyac se inge nu sesr kais sie.
(34:2):In Ezekiel 34, fus ak luo an akkalemye la elos nwe ehkin Mwet Shepherd, tusruktu, inge GOD Papa el ahkohla in sang kaciyuk nu selos fal nuke ma suhfacl ma elos puhtatyang nukac.
In oana ke fahk lal Ezekiel ke sapta 34, fus 2 an, el fahk ouinge, “Kom, mwet sukawil moul la, fahkak kas in palu lain mwet kol lun Israel. Kaskas nu selos ac fahk kas ma nga, LEUM GOD Fulatlana, fahk nu selos inge: We nu suwos, kowos mwet shepherd lun Israel! Kowos sifacna karinginkowosyang, ac tia karingin sheep uh. Siyuk se ma oasr inge pa, kuh tia ma kuhnen Mwet Sheperd se in lihachang sheep natul? Kut etuh muh pa inge se ma Jesus el akkalemye nu sel Peter in 1 Peter 5:2, “tuh kowos in liyaung un mwet lulalfongi su God El asot nu inpouwos, oana sie shepherd el liyaung un sheep natul. Kowos in tia srangesr, a kowos in insewowo in oru, mweyen pa inge ma God El lungse. Oru orekma lowos, tia tuh in moul nu suwos, a ke lungse na lowos in kulansap.”
(34:3): In Ezekiel 34, fus ak tolu an, akkalemye la Shepherd inge numla milk, ac nukum nuknuk ma orekla ke unen sheep, ac uni sheep ma wo oemeet uh ac kang ikwa kac. A kowos tiana liyaung sheep uh:
Ke fus ak tolu an, akkalemye la Mwet Kol lalos inge eis enenu lalos ac mwe insewowo nuke mwe mongo, num, ku ma elos in nukum; ac elos lihkuhnsac ela enenu lun mwet wiyelos. Oana ke simla ke Ezekiel 34:3, “Kowos numla milk, ac nukum nuknuk ma orekla ke unen sheep, ac uni sheep ma wo oemeet uh ac kang ikwa kac. A kowos tiana liyaung sheep uh.” Mwet Shepherd inge tiana kacringin sheep natulos. Mwe insewowo nukewa ma elos enenu in sang kacsru mwet ma oan in kacringinyuk lalos, elos tiana kacsru. Akkalemye pac la Mwet kol ku Priest ma kuh in kacsru in kasla ke ouiyac suhfacl inge; elos tiana oru ip kuhnwalos. Ma inge arulana loes liki finsrak yok ke Lungse kawil lun GOD Papa nu sesr, meyen El ke na tuh kut in ahkacsruhi ac in oru mwo nu sin Mwet lili ac lulu.
(34:4): In Ezekiel 34, fus ak ahkosr an, “Kowos tiana karingin sheep ma munas, ku akkeyala ma mas uh, ku pwelah can kinet kaclos. Kowos tia folokunma ma som liki un sheep uh, ku suk ma tuhlah uh. Kowos tia oru ma inge, a kowos oralos arulana koluk.”
Fus se ak ahkosr inge akkalemye la Mwet kol lalos nwe ahkuhlen selos ma munas; wangin pacna ma elos oru ku suk in sang kacsrelos. Oana ke akkalemyeyuk in Zechariah 11:16, “Nga filiya mwet shepherd se in taran un sheep nutik, tusruktu el tiana kasru sheep su apkuran in kunausyukla ah, ac tia pacna suk sheep ma tuhlac kac ah, ku unwala sheep ma kinet uh, kut kite ma ku kac uh. A el kang ikwen sheep fact oemeet uh, ac olela falkalos kewa.”
(34:5): In Ezekiel 34: fus ak limekosr an, “ Ke sripen wangin shepherd lun sheep uh, oru elos fahselik nu in acn puspis, ac kosro lemnak uh onelosi ac kangulosla.” Finsrak uh pa in oasr shepherd se (ku Mwet Kol se). Mwet Kol se enenu in lihac ang mwet lal (oana ke shepherd se el lihac ang sheep) natul. Ma lun shepherd se in karingin mwet lal (oana ke shepherd se el lihac ang kosro lemnak uh in tia uniya sheep ac kangalos la.)
(34:6): In Ezekiel 34: fus ak onkosr an, fahk muh “Na sheep nutik uh som nu yen fulat fin inging uh ac nu fineol uh. Elos fahsrelik nu in acn nukewa fin faclu, ac wangin mwet srike in som sokolos, ku konalosyak.” Ke sripen wangin sherpherd ma oru orekma la in suwos ac paye, pwenang sheep uh kacingnwelik nu yen ma kosro lemnak uh som nu weh. Ouiyac inge sik pac nu sesr mwet uh; kut ahkuhlen pac la pacl ma Mwet kol lasr uh tia oru kol lalos in fal nuke ma kut mwet uh oasr kac; orella pac inmacsrlon mwet uh in muhsalehlik. Oana fahk se in 1 Timothy 1:6, su fahk ouinge, “Kutu mwet uh forla liki ma inge ac kufla nu ke kaskas lusrongten.”
KONOKON
Kacpuhn mwe lutlut se inge pah kut Mwet Kol in oru kol lasr nu sin Mwet uh in oana sie shepherd mwowo su lihac ang sheep natul. In sohkohlos ma tuhlac, ac fohlokonolos mwe nuke kacringinyuk mwo ac paye. Elos ma kucnet (wounded) kuh oana mwet suhpacrla, ku sehsrufongyak; ma lacsr mwet kol in suk inkacnek ma ah ku in fohlohkonolos mwe nu yurin GOD Papa Tumasr. In oana ke Jesus el tu siyuk sel Peter la el lungse el, Peter, el tohpohkol ac fahk, In akasmakinye kut la kut fihn tia oru kolyuk lasr in mwo, mwet ma kut kacringin uh ac muhsahlelik ac fahsrelik nuke an elos fah suhlela in som nuke lungse lalos sifacna. Pa kaclmeyen fahk se lun Leum (Jesus) su El akkalemye in gospel lal Matthew muh el pakomuta Mwet uh. Sripac yok lal an pa akkalemyeyuk in Matthew 9:36, “Ke el liye un mwet puspis el arulana pakomutalos, mweyen elos fosrnga ac tia ku in kasrelos sifacna, oana sheep su wangin mwet sropo la.”
Kulo ma lulap nu sin GOD Papa Tumasr ke sie mwe lutlut mwowo ke nga ehkin sie mwet kol ac ouyapac ehkin sie Papa. Mwe lutlut uh arulana tehsisr nuke ma oan yeh mutacsr in sifil lohacng nuke kol ac kacringinyuk lasr nu sin tulik natusr, wiyesr, ac nukewa ma oan ye kol (leadership) lasr.
 

LM Driskell J. Jack

Kosrae Seattle Congregational Church

23254 25th Avenue South

Des Moines, WA 98198
(206)946-0947, (206)592-1736

alukosraeseattle@gmail.com

Share on facebook
Facebook

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.