Kunokon
Wednesday August 24 2016
Sifac: Sulaclah Ma Sap Uh ac Moul
Mwe Read: Deuteronomy 11:13-21
Sifil kaksakin Leum God Fuhlactlacna ke moul ac pacl wo lasr kewa. Sifac se lasr nuh ke Wednesday se inge fahk muh “Sulaclah Ma Sap Uh ac Moul,” oasr in Deuteronomy 11:13-21. Puhsren kwacfe lal Moses nuh sin Mwet Israel, yohkna elos suc srikliki yac 20 ke elos tufoki liki acn Egypt, pa inge. Elos in sulaclah in ahkos ma sap luhn God ac in kuhlacnsuhpwacl muhkena fah elos eis moul. Elos fin oruh ohinge, Leum God Elac fah suhpwacma af uh in ahkkapye sacn suhnwaclos ac in kite kosro nahtuhlos. Elos fin tiac oruh oacna, facl selos ac fah puhlamlamlah, ac elos ac sa na misac. Elos in kapriyac ma sap luhn God ke paholos ac motonsrolos. Elos in sruhmuhn ma sap uh nuh sin tuhlik nahtuhlos ke pacl nuhkwewa elos fuhfahsryucsr, monglac, ac orekma. Elos in simuhslah ke koasrusru ke motonoa selos ac nien utyak nuh ke kalkal lalos. Elos fin ohruh ohinge, elos ac tuhlik nahtuhlos ac fah moul paht ke elos ac utyak nuh ke Fuhlan Wucleang kuh Canaan. Scripture se inge kahsrekuht pac Mwet Luhlahlfongi misenge in luhlahlfongi Christ ac orekma, suc pa ahkfalyeyen liyacacng ma sap luhn God, na kuht fah wi eis moul ma patpat. Ohinge, God Elac fah oacyacpac ahkinsewowoye acn sesr ac moul lasr.
