Kunokon
By Robert Kilafwasru

Monday July 6 2015
Sifac: Nimet Akkihye Nununku Suwohs
Mwe Read: Exodus 23:1-8

Robert Kilafwasru

Sifil pac akilen lung kulang lun God nusesr nukewa. Ke kut pulakin moul wowo El ase nusesr neke pacl se inge. Ac ke mwe lutlut ma El akolah nusesr nukewa in lutlut kac.

Mwe read se inge sramsramkin “ Ohiyac Fal AC Nunku Suwos.” El tuku ke masap singucul ma God el sang nusin mwet Israel ke El elos tuku sun finol Sinai. Masap ak 9 (Exodus 20:16 ) suc kahfe kut in tiac kahskahs kikiacp lain mwet tulan lasr el liksreni akyokyeyuck ke verse 1-3 ke mwe read se inge. Kut in sensenkackin in tiac akyokye sramsram ma tiac paye kuh in tiac kinauk ma sutuh. Kut in tiac oru ma sutuuh finne pusiyen mwet uh pa oru uh, a kut in tuna kuh ke lulafongi paye. Verse 4-5 sramsramkin ohiyacsr nusin mwet lokoalok lasr. Kut in kasru mwet lokoalok lasr ke pacl elos enenu kasru. Oacna ke Soakas 25: 21-22 akkalemye “ Mwet lokoalok lom fin masrinsral, sang mongo nal; el fin malu,sang kof nimacl. Tuh ke kom oru oinge el ac arulacna mwekinla sum, ac Leum God El ac fah moli nu sum.”Ma inge nukewa pa ohiyac fal ma Leum God el kena kut in fahsr kac oacna ke el sapkin nusin mwet Israel.

Verse 6-8, sramsramkin nunuku suwohs. Masap lun God el simla nusin tulik nutin Israel kut in luti ac fahsr kac. God el fah nunukuh mwet nukewa ke len in nunuku Lal fal nuke oraclah lasr kais sie, a tiac ke kasrpacsr. Mwet sukhasrup se el fin orekma ma koluk, el ac fah kaiyuck fal nuke nunuku lun God.
Ohiyac fal kut in moulkin pa oihyac lun God mukena. Kut in karingin sie sin sie in pacl nukewa ac tiac srisri in ohiyac lasr, oacna ke Leum God El oru nusesr nukewa. Kut in oyacpa kahfeang in purue ke mwet lokoalok lasr ac sang ma nukewa nusin God ac El ac fah oru nunuku suwohs lal ke len suc ac fah tuku. Kulo kaksakin God ke mwe luti wowo nusik ac nusesr nukewa.

RKILAFWASRU

Leave a Reply

Your email address will not be published. Required fields are marked *