Kunokon
TUESDAY: July 18, 2017
SIFAC:”Kahs In Yoksra Ac We”
MWE READ: Ezekiel 2:8-10
Mwe read se inge simla sel mwet palu Ezekiel nu sin mwet Jew ku Israel in pal soh. Elos oru na ma koluk, alu nu sin God saya ac aktoasrye God ke lusen pal na loeloes panang God el panglol Ezekiel tu elan tafela pusral nuselos. Kena lun God nu selos pa elos in moulkin moul mutal ku fasr ke ma lungse lun God. El oayapa kena tu Ezekiel elan tia oru oana mwet Israel ngan oru u oana ke Jonah, Moses ac Jeremiah oru ah. Oasr na nunak in alolo lalos ku nunku in lain ma sap lun God ke pal el sang kukokon nu selos ingan. Akkalemyeyuk la oasr sie book limlim el liye kohkoh yang nu sel su simisyukla ke kas in asor, tung ac welac. Kas ingan kewa simla nu selos mwet Israel in akkalemye lupan kasrkusrak lun God nu selos. Mwe luti se inge tuku nu sesr in nunku ke koluk lasr la kut fin tia forla liki ma koluk lasr oana mwet Israel inge, kut ac fa pulakin kaiyuk lun God nu sesr ke mwe asor, keok ac tung. Kut in oayapa nunku nuke kunokon su God el akola nu sesr in oru. Oru ke insiasr kewa ac tia alolo. Lulalfongi la el mukena pa God se su kut nukewa enenu in akfulatye ac orekma nu se.
