Tuesday November 24 2015
Sifac: Muhta Yurin God
Mwe Read: Psalm 27:4,5,8,9, 11-14

LM Driskell Jack

Kaksakin GOD Papa Tumasr ke moul lasr. Ac ke wik in Thanksgiving se inge, arulana pus ma kut enenu in kaksakin GOD Papa Tumasr kac; yok liki nukewa ke kut moul sun len se inge. Len misenge uh, Tuesday, November 24, 2015, ahse nu sesr sie mwe lutlut na mwowo ke sifac se inge: ‘Muhta Yurin God’.

Psalm se inge, el kuhsen prue soko lal David. Oasr Psalm 150 pa simla luin BIBLE Mutal natusr uh. Ac 73 sin Psalm inge ma simla ke nunak ac kaksak lal David, su pa sie Tokosra in pal se ma an Israel and Juda tuhkehni ke kacringinyuk lun United Kingdom. Tokosra Saul pa Tokosra se omeet lun United Kingdom ke luhsen yeac 40, na Tokosra David ke lusen yeac 40, na Tokosra Soloman ke lusen yeac 40. Tokolos, United Kingdom fahsrelik, su pa kalem ke an Israel (Northern Kingdom) ac Juda (Southern Kingdom).

Kuhsensiyuk se ma oasr ke pal se inge uh pa: Ku David el sumusla Psalm soko inge ngac? Kutu motkwe muh el sumusla meet liki el Tokosra la ac ke pal el ahkuhlen ma kuhsrungul. Kutu motkwe nuke pal se ma Papa ac Nina kiyel pangla sin GOD Papa. A kutu motkwe muh el sun matweh matu lal, ac el esamak kacsru puspus lun GOD Papa nu sel. Ma inge nukewa paye sikyak, tuhsruktu, mwo ke kut som nuke ma Simusla in liye la meac akkalemyeyuk kac.

Ma Simusla akkalemye la ke sie sin meun ma David el lain Mwet Philistia el arulana totola (2 Samuel 21: 15). Ma Simusla akkalemye pac la “A David el fahk nu sin God, “Nga orala ma koluk yohk se. Nunak munas, sisla koluk luk. Ma na lalfon se pa nga orala”(1 Chronicle 21:8). David el ahkuhlen la el nwe totola ac yok ma koluk ku suhfal ma el orella, tuhsruktu, GOD Papa el srak lungse el; ac wehlul ke sripen paye inse ahuhliyak lal tuhkin el orella ma suhfal. Elos mwet Israel elos ahkuhlen pac yok sripaiyel David,…, ac Elos fahk, “Kom pa mwe finsrak lun Israel, ac kut tia lungse kom in wanginla”(2 Samuel 21:17).

(v. 4): Ouiya se ma Mwet Israel fahk kel David inge, pa David el ahkuhlen ke kacsru yok lun GOD Papa nu sel. Pa el akkalemye ke fus ak ahkosr, “Nga siyuk sin LEUM GOD ke ma se, Ac ma sefanna nga lungsik: Tuh nga in muta in lohm sin Leum GOD in moul luk nufon, In liye kasrpen wolana lal, Ac in siyuk ke koko lal” (Psalm 27:4).
(v. 5): Fahk se lal David inge akkalemye na paye finsrak lal in muta ye lulinpoh-kuh lun GOD Papa, meyen el ahkuhlen la fihn tia ke kacsru lun GOD Papa nu sel, el luhkun sun ongaiya tari. Pa kalem ke (v.5),

“In pacl in ongoiya, El fah lisringyuyak; El fah karinginyu in Tempul lal Ac oru tuh nga in moulla fin sie eot fulat”(Psalm 27:5). Ke David el ahkulenak na paye ke karinginyuk lun GOD Papa, pwenang, el arulana suk pa in el pa muhsacehak Tempul Lal, mwet uh in kuh in alu ac akfulatyel. In oana ke Zecharaiah el tu fahk, “Ac fuka lupan wo ac oasku lun acn sac! Mwet fusr ac fah kapak ac fokokoi ke wheat ac wain we” (Zecharaiah 9:17). Kut ouyapac esam kel Joash (sie sin fuhteh lal David) el tuh wukla lom Tempul ke luhsen yeac 6 ke pacl se ma mwet lohkaclok lal sohkol.

(v. 8): “Ke kom fahk, “Fahsru ac alu nu sik,” Na nga topuk, “Aok, LEUM GOD, nga ac fahsrot”(Psalm 27:8). David el arulana oaru in oru alu lal nu sin GOD Papa ke sripen el ahkulen lupan pakoten lun GOD Papa nu sel. Pwenang, pal el tia ku in som nu in lom sin GOD Papa in oru alu lal, el prue a fahk, “Long, O God, ke pal nga tung, tia ke tung ac keok lun insiyuk uh mukena, tu kom ku pac in lipsre ke suhpar lun puhsrek.” Ouinge, David el ahkulen la pal nukewa ma el faksuhfi in prue nu sin GOD Papa, el ahkuhlen top nuke mwe siyuk lal.

(v. 9): “Nimet wikinkomla likiyu! Nikmet kasrkusrak sik; Nikmet supwala mwet kulansap lom liki kom. Kom nunu mwet kasru luk; Nikmet fahsr likiyu ku sisyula, O God, Mwet Lango luk” (Psalm 27:9). Inge David el kapsra pal se ma kut wangin liki karinginyuk lun Nina ac Papa Tumasr la ouiyac se inge oana ke kut tuhfacla liki GOD Papa Tumasr in kusrao. Oasr muhkacimtal la se ac oasr nukanla lasr, pwenang el prue ac siyuk sin GOD Papa in tia wukla luhkel ku in tia kasrkusrak sel.
(v. 10): “Sahp papa tumuk ac nina kiuk elos ku in sisyula, Tusruktu LEUM GOD El fah karinginyu”(Psalm 27:10). Ke pal se ma Nina kiyacsr ac Papa tumasr wangin yoros, GOD Papa el karingin kut.

(v. 11): “LEUM GOD, luti nu sik ma kom lungsum tuh nga in oru, Ac kolyu ke inkanek wo lom, Mweyen pus mwet lokoalok luk”(Psalm 27:11). David el ahkulen lupan kacsru yok lun GOD Papa nu sel. El etu la fihn tia ke kacsru lun GOD Papa nu sel, el luhkun sun ongaiya ke Mwet lohkalok lal. El ouyapc ahkuhlenak la pal nukewa el oru ma lungse lun GOD Papa; mwe insewowo ac mwo ouiyac sik nu sel ac sucu lal.

(v. 12): ‘”Nikmet sisyula nu inpoun mwet lokoalok luk Su lainyu ke kas kikiap ac kas in aksangeng”(Psalm 27:12). David el prue ac siyuk tu GOD Papa elan tia ngetla luhkel meyen arulana oasr mwet srungal, ehfin nwe wangin ma el oru koluk nu selos.
(v. 13): “Nga etu tuh nga fah moul ac liye Woiyen LEUM GOD in moul se inge”(Psalm 27:13). David el etu la oasr ma elya el sun ke moul se inge, tuhsruktu, el asmak in etu la el fihn fahsr ke inkanek lun GOD Papa, el ac fah kutangla ma puspus ma fongulul.

(v. 14): “Lulalfongi in LEUM GOD. Lulalfongi, ac tia fuhleak. Lulalfongi na in LEUM GOD”(Psalm 27:14). Fus se inge akkalemye lupan lulalfongi lal David ke sripen yok kacsru lun GOD Papa nu sel. Lulalfongi lal David arulana ku ke sripen el etu la nwe oasr mwet lohkaclok lal, GOD Papa el welul in kacrungul ke pal mwo ac pal koluk.

KONOKON: Mwe lutlut se inge akkalemyeyuk nu sesr ke soko prue lal David su puhlakin lungkulang ac pakoten lun GOD Papa nu sel. David el tuh akmusra la nuke Tokosra lun an Israel ac Juda ke el yeac 16. Tusruktu, el tia muhta ke siyac in Tokosra lal nwe ke el sun yeac 30. Ke pal se ma Tokosra Saul el karingin Mwet Israel ac Juda, el srike pac elan unilyac David. David el etu la sok muhkena pa sripa lal Tokosra Saul. Ke el Tokosra lun Israel ac Juda, sie natul (Absalom) tu suk pa in lohkaclok nu sel. Pa inge kutu ma sik nu sel David su el kutangla; tia na suk in uhpac nu selos ma kacsel ku suk in unilyac. Kutangla lal uh sik ke sripen el kupacsryang nu sin GOD Papa in muta in karinginyuk lal. El akkalemye la pus pal el puhla pac la tia fuhsacsr nu sel, tuh el srike in muhta na ke lulin poh kuh lun GOD Papa. Pa akkalemyeyuk in (Eoksra 3:24-25), “LEUM GOD mukena pa oasr yuruk uh; ke ma inge El na pa mwe finsrak luk. LEUM GOD El wo nu sin mwet nukewa su lulalfongi in El.”

Kulo kaksakin GOD Papa ke mwe lutlut mwo tuku in akasmakinye kut in Muhta na Yurin LEUM GOD lasr ke pacl mwo ac ke pacl koluk.

LM Driskell J. Jack
Kosrae-Seattle Congregational Church
alukosraeseattle@gmail.com