Kunokon

Thursday June 16 2016
Sifac: Luhlahlfongi God
Mwe Read: Hebrew 11:13-22

Hanna Alokoa
Hanna Alokoa

In sifil paing met nukewa a Kaksakin Leum God ke kulang Lal nusesr nukewa.
Mwe read se inge srumun ke lupan lulalfongi lun met somlah. Ke sripen yok lulalfongi lalos panang elos tia liye ke ma oan ye mutalos, a elos liye ke ma elos etu a finsrak nukac. Elos ngetla na liye finsrak yok se lalos ke wulelah lun Leum God nuselos; ac elos etu la ac sikyak oana ke Leum God El wulelah. Ke sripen lulalfongi yok, elos fahk lah muh, elos tiac ma ke an se inge meyen asr acn se selos akoeyuklac sanelos. Panang oru Leum God El sang nuselos in panglol mu El God lalos.

Ke lulalfongi, Abraham el srikeyuk ke tulik sefanna natul, Isaac. El ne etu lah tulik se inge tuku ke wulelah lun Leum God nusel, el tena fuleak lulalfongi lal nusin God. God el sapkin elan kisackunul Isaac, ac Abraham el akola in oru oana ke Leum God El sapkin. Wangin alohloh lal in kisackunul Isaac; finne el etu lah wulelah lun Leum God ac tuku kacl Isaac me. Ke sripen yok lulalfongi lal, Leum God El akfalyellah wulelah Lal nusel and srukyac moul lal Isaac. Tu Leum God El ac fah akpuhsye fitac lal Abraham kacl Isaac me.

Ke lulalfongi, Isaac el wulelah nusel Jacob ac Esau ke mwe insewowo suc ac fah tuku. Lulalfongi lal Jacob pa oru el akinsewowoye tulik natul Joseph meet liki el misac. Ke lulalfongi lal Joseph, el oru sramsram ke som lun tulik nutin Israel liki facl Egypt; ac sapkin nuselos ma elos in oru ke srel tukun el misac.
Lulalfongi lalos in pal meetah use nusesr misenge in wi ipeis ke mwe insewowo suc ma Leum God El wulelah nusin mwet Lal. Elos in pal meetah tiana sun wulelah ma elos etu kac tusruktu, elos engan ac insewowo in oruh ma Leum God El sapkin nuselos in oruh. Efu? Meyen elos etu tari lah elos ac sun finsrak lalos ke acn wolana ingo tukin ma nukewa. Lulalfongi yok lalos sang kuh nuselos in fasr na nu meet ac tia fuleak finsrak lalos.
Pus pacl pahtlac in sun kut ma kut finsrak nukac uh, na kut mutacwack in fuleak finsrak lasr sin Leum God. Kut mutacwack tohrkaskas yak ac suk inkanek lasr sifacna in sun mwe finsrak lasr. Tusruktu Leum God El akasmakinyekut kut in esam lah, El mukena ku in use finsrak yok lasr. Lela kut in tiac munahslah ke lulalfongi lasr in oru ma Leum God El sapkin nusesr. Kut enenu in tia fuleak, a kut in ngetlah nuke finsrak yok se lasr in ma uh wi Leum God engan ma patpat ingo. Lulalfongi Leum God.

Leave a Reply

Your email address will not be published.