Kunokon
By LM Quartus Esau

Sunday December 27 2015
Sifac: Kuhlacng Finne Suhkahsruhp
Mwe Read: Matthew 23:2-12,Mark 12:38-44

LM Quartus Esau

Oinge in me read luo inge, Jesus el kaskas lain oru lun Mwet Luti Masap ac Mwet Pharisee inge, ke sripen elos ne sasla ke masap, a elos tiana moulkin ma elos luti u.

Ip se met ke me lutlut se inge akkalemye ke ‘sukyen kaksak’ lun Mwet Luti Masap ac Mwet Pharisee. Elos mwet sasla ke masap lal Moses. Luti sumat lalos ke masap lal Moses panang mwet Israel in arulana akfulatyelos. Jesus el sensenkakin mwet tuma lutlut lal in tiac oana elos. Meyen elos ne kalia ac sasla ke masap, elos tiana moulkin. Elos sifana akfulatyelos, elos lungse in akfulatyeyuk elos, ku in pangonyuck elos mwet luti, ku kutena e ma ac akfulatyelos liki mwet u. Sumat lalos ke masap panang elos oakiyac akwuk ku oiyac ma tuh sang akupaye moul lun mwet munas u.

Ip ak luo ke me lutlut se inge sramsramkin ‘kulansap pusisacl ku mwet kulansap pusisacl’. Tafonglac yok se lun mwet luti masap ac mwet Pharisee in me read se inge pa kena lalos in akfulatyeyuk sin mwet u. Oiyac se inge kisrung ku lain El Suc Kulana ac Fulatlana. Ke sripen mwet u oreklac in luman God, kut nukewa oana sie, ac kut nukewa muta ye akwuk ac ku lun God suc orekutlac. Oinge, kut in akpusisaclye kut yurin mwet nukewa. Tusruktu, in ekin sie mwet luti ke kahs lun God, fal in akilenyuk ac akfulatyeyuk. Oinge elos suc lungse mwet kol, elos in mwet kulansap nusin mwet u.

Ip safla ke me lutlut se inge akkalemye ke ‘kulang payena’. Jesus el liye ke mwet u sang mwe sang lalos nuke nien money lun temple uh. Mwet kasrup u elos sang mwe sang na yohk. Oasr katinmas sukasrup se ma oayapa wi sang me sang lal nuke nien money u. Jesus el akkalemye la, me sang lun katinmas sac pa mwet tuma lutlut elos in etain ke sripen el sang ke insiel nofon. El ne etu la kewana ma oasr yorol pa el sang, el fulela moul lal nusin God ac lulalfongi la El ac fwa karungunul ac kasrel.

Pus ma kut ku in eis in kasre kut ke me lutlut se inge. (1) Tiac sifana akfulatye kut, (2) Moulkin kahs lasr (3) Lulalfongi God pacl nukewa, (4) Engan in Sang ac Sang ke paye..

Leave a Reply

Your email address will not be published.