Kunokon

SATURDAY: July 29, 2017
SIFAC:”Tohkohsrahi Lal David Sifwil Fohlohkihnyuckyak”
MWE READ: Amos 9:11-15

Mr. Kalis Obet

Sifwilpac paing komwos met kol wi members ke Kahs In Kol ac kulo nu sin God ke moul lasr nukewa. Sifa se inge lumeyuklac oinge ac srumunyuk in me read se inge pacnacng in oswellah kusen siuk yok luo sramsram u in tungal: (1) Suh Amos, ac (2) Tohkohsrahi Lal David Oan Ohyac Ne Sifil Folokyak.

Amos el sie sin Met Pahluh Srisrik 12, minor prophets, in Wuleacng Matu. El Met Pahluh in yac 760 – 755 B.C. ke yeac in tohkohsrah lal Jeroboam II luhn acn Israel (786 – 746 B.C.), ac Tohkohsrah Uzziah luhn Judah (760 – 750 B.C.) . Amos el ma in tohkohsrai Judah tu el som oru fwahkack lal in acn Israel. In we lal Amos ah kahlem mu met Jews elos tilac ahkulen karunginyuk ac luhngse luhn God nu selos ke sripen kahsrup lalos weacng lah arulacna wo ma nukewa nu selos oru elos, met kahsrup tiac luhngse kahsrelos suh suhkahsrup ac enenu. Elos arulacna oaru in karungin Ma Sap ku akwuk luhn alu ac nunkumu elos ahkinsewowoye God tu tiac, meyen wacngin luhngse paye lalos nu sin God pacnacng elos in ahkwot in eis kaiyuk luhn God nu selos.

In tungal sifac lasr u, God El sang kaiyuk nu sin Mutunfacl Israel ac Judah ke sripen ma koluk lalos pacnacng in akulenyuk mu Throne lal David (in lohm sel David) oacna in wacnginlac. Verse 11, 12 fwahk lah ne oinge nu selos tusruktu ohlela luhn God nu sel David fwahk mu sie sin fulin tulik natul David ac fwah enenu in muta fwin throne se inge ke fuhl nuke fuhl ku ne tok ma pahtpaht, 2 Samuel 7: 12 – 16 ahkyokye ohlelah se inge. Tohkohsrahi sasu se inge tiac ma ac kolyuk sin government luhn met u a ac fwah kolyuk sin Jesus Christ oru ac fwah wacnginlac lihsrlisr se ma kohsraclah in Met Jew mukena a ma nu sin kain met nukewa ma eis God ke nunak paye lalos, kalmac pa ma nu sin kewana Met Jew ac Gentiles. Verse 13 – 15 in me read se inge fwahkack ke me insewowo nu sin met luhn God tukin El pahngoneni met lal nukewa wi ipin acn nukewa ma tu oan ye kohkoh lal David meet ah ac oacyacpac sifilpac folokyang. Ma wolacna God El ohlelah kac inge som nuke, kasrpen fukun imac lalos, ahksasuyeyuklac luhn fwin acn u, folokunyukme luhn met kac srohoh in sifwil muasaheack acn musahlah lalos, muht ke me mongo ac me nim, ac e tuhfwah wacngin pacl se tok ac fwah sifil mokleyukla elos liki acn God El fuhlelosi we.

Sahyen ma puhs kut ku in eis me lutlut se inge in kahsrekut kac, nga sulaclah ip ekasr inge: (1) ke sripen misac moulyak luhn Leum, inge kut Met Gentiles wo oiyac oasr in Tohkohsrahi sasu inge, nga/kom in sulaclah; (2) lelah kut in fwahsr liki nunak tahfonglac lun Met Israel ac Judah in pacl sac in nunku mu oaru lasr in fwasri alu ku karungin oakwuk (religious rituals) kuh kut in oru ma wo ke pacl se na fwal; (3) God El saneyu/kom in ahkkahlemye lungse ac luhlahlfongi paye luk/kom nu sel in fwahack ke oiyac lasr in pacl nukewa nu sin met nukewa, ac (4) lelah nu sik/kom in eis kahs lal Amos in usungkuti kuh in moul in luhlahlfongi lasr in fwal nuke luhngse luhn God esam lah OHLELAH LUHN GOD TIAC KU IN TAHFONGLA, LAH SA KU PAHT AC SIKYAK.

Kalis P. Obet

Leave a Reply

Your email address will not be published.