Kunokon
By LM Quartus Esau

Sunday July 26 2015
Sifac:Leum God El Insewowo In Fahkak Pakoten
Mwe Read: Micah 7:14-20

LM Quartus Esau

Yok engan ac kaksak luk in sifil wi kowos ke me lutlut lasr nuke Sunday, July 26. Ac meet liki ngac tufwa oruh kasruh srisrik luk nuke sifac se inge, nga lungse sifil orala kulo ac srui luk nusin God ke kulang Lal ma kut srakna pulakin neke pacl se inge. Kut finne se-asmak in moul lasr kutu pacl, a kulang Lal nusesr tiacna wanginlac. Finsrak Kahs Moul Lal ma El acse nusesr ke ao se inge in ku in mokle kut nuke me finsrak ma oasr yorosr ke moul in lulalfongi lasr ke Leum Jesus Christ.

Koal in oana ke sifac lasr nuke me lutlut ke Sunday, July 26 an akkalemye u, “Leum God El Insewowo In Fahkak Pakoten”. Me read se inge pa aksafye Unit ak 2 ke Quarter se inge (4th) suc aksafye pac kahs in palu lal Mwet Palu Micah nusin mwet Israel ac Judah.

Ke kohtoh sac, kut long kusen mulat, kusen sufan, kusen sensenkakin ma Mwet Palu Micah el oru nusin Mwet Israel ac Judah ke sripen moul koluk lalos ye mutun Leum God. El palye ke kaiyuk ma ac putati nu fwalos elos fin tiac forla liki oiyac koluk lalos inge. Misenge, ke me read lasr u, Mwet Palu Micah el pang nusin God in suk kasru, in kasru mwet lal. Ke ip se meet kutu liki mwe read lasr u, Micah el akkalemye la, wanginlac finsrak lal ke sripen wanginlac mwet wo. Mwet nukewa orek ma koluk. Finne mwet ma srulun wo ac lulalfongiyuck, oasr pac koluk lalos.

Oinge, Micah el pray nusin God ac kafe ke kasru Lal nusin mwet Israel (v.14). El fwak la mwet inge elos mwet sollac Lal (Exodus 19:5) ac elos enenu karinginyuck Lal nuselos. Petsac se ma Micah el srike in elakin ke muta mukaimtacl lun mwet inge pa, mwet inge elos muta ke acn ma yok sracl we, mwet u masrinsracl, finne ma na fal elos in tiac pulakin masrinsracl ke sripen acn raunelosyak mut ke me mongo. Oinge el ngisre Leum God Elan sang elos in sifil pulakin sukosok ac moul mislac ma elos tu pulakin sie pacl ah, ke elos muta in acn Bashan ac Gilead.

Top lun God nuke pusren pray soko lal Micah inge pa kalem in verse 15-17 an. God El fwak mu “15 Oana in len in illac lom liki fwal Egypt, Nga fwa fwakak nu selos ma sakuruk. 16Mutunfwalu fwa liye a fwa mekin ke ku lalos nukewa; elos fwa filiyac paulos fwin oalulos; srelos fwa silongkas. 17Elos fwa lou kutkut oana soko serpent; oana ma mwurakrak lun fwalu elos fwa tuku rarrar liki acn srik selos; elos fwa tuku wi sangeng keyum.” (Bible Mutal – Older Version).

Ma sakuruk ac usrnguck puspus Leum God El oru meet liki illac, ke illac, ac tukun illac lun tulig nutin Israel ke srouh lalos in fwal Egypt. Na panwang El fwak mu, in oana ke Nga tu kasre kowos in som liki keok lowos Egypt, Nga ac oayapac kasre kowos. Mutunfwal nukewa ac fwa akpusisaclyeyuck sin Leum God. Ku lalos ac fwa tiac ku in kihsrucng pakoten lun God nusin mwet Lal. Ac ke sripen Leum God El ac kasru mwet Lal, pwanwang mutunfwal inge nukewa ac akpusiselyeyuck ac elos ac fwa rarrar ke sangeng.

Ke Verse 18-20, Micah el akkalemye ke lupan Pakoten yok lun Mwet Lango se inge suc payena in pacl nukewa nuke Kas Lal. In verse 18 el siyuk la “Suc sie God oana Kom, suc nunak munas nuke ma koluk…” (Bible Mutal – Older Version). Micah el akilen fwak lun God nuke ma usrnguk ma El ac fwa oru, ma ac oana ke El tu oru ke elos tifoklac liki srouh lalos Egypt (7:15), panwang El siyuk, “Suc sie God oana Kom?…”

Verse ak 19 akkalemye ke sifwa lasr u. Finne lupa ka ma koluk ma mwet Israel ac Judah orala, tusruktu pakoten lun Leum God yoklana pwanang El akola in nunak munas nuselos. El God mutal se suc oru nununku nuke ma koluk, tusruk El Insewowo in Fahkak Pakoten Lal.

Micah el aksafye palu lal in akkalemye payena lun God nuke kahs Lal. Kas Lal suc El wulela nusel Jacob ac Abraham. El ac karingulos. El ac God lalos. Kacl Abraham, mwet fwin fwalu ac akinsewowoyeyuck. Wulela lun God nukewa akpayeyuck nusel Jacob ac Abraham. Tukun year puspus, Mary, ninac kiacl Jesus el akkalemye kahs lal Mwet Palu Micah in verse ak 20 inge (Luke 1:54, 55).

Payena la wangin kisrungyen pakoten lun God nusin mwet Lal. Finne Wen sefanna, finne saok Sel, El fwakak pakoten Lal nusesr mwet u ke ma koluk lasr, in kisackin Wen se inge fin sakseng.

Nga lulalfongi la me lutlut se inge oasr yorosr kewa in akilen la pakoten lun God nusesr u yoklacna ke sripen El kena kut nukewa in mau welul pacl se tok. Nga in sifana akwoye moul luk ac finsrakkin pakoten lun God in tiac alikiyuclac.

Kuloh nusin God ke me lutlut wowo ma fwal in lutiyuc ke moul in srike luk u.

Leave a Reply

Your email address will not be published.