Kunokon
Sunday June 26 2016
Sifac: Etuh A Pihlesruh Kohllah Nuhke Ongaiyac
Mwe Read: Rome 1:18-32
Letter lal Paul nusin church Rome pa kalem in me read se inge. Kalem mu Paul el muta Corinth ke el oru Fwasr Ak 3 lal ac sumusla letter se inge. Paul el simis letter se inge in akkalemye la el akoo in som nu yorolos in welulos orekma ke kitin pacl ac in suk kasru selos ke akoo lal in som nu Spain.
In me read se inge, Paul el akkalemye la mwet nukewa, gentiles ac Jews, kewana orekma koluk. Na panang kasrkusrak lun God ac putati nu fwaclos. God El ikucsla ac oru mwet nukewa in etu ac kalem ke ma paye. Elos etu God, tusruktu elos tiana akfulatyel. Elos losrla ke kain in ma koluk puspus: nunak koluk, rapku, sok, akmas, kutasrik, sullal, etc. Elos finne etu la mwet ma oru ma inge, ac fal in misac, in oana ke masap lun God, tusruktu elos pilesruh ac tiac na ekulla moul lalos.
Me lutlut u tuku in akesamkinye kut misenge la, oasr masap lun God ma karingin kut ke orekma lasr, ku oiyasr. Kut fin etu ac pilesru, ac fwa me pakomuta nusesr.
