Kunokon
Sunday May 8 2016
Sifac: Fahk Kuloh
Mwe Read: Luke 17:11-19
Mwe read se inge ma pac ke sie sramsram wowo ma akkalemye ku lun Jesus in akkeyala mas ac oayapa lulalfongi yok lun mwet ma sikyak ke mwe lutlut se inge. Tu oasr pacna mwe nunak ma fal in akngetye kut ke lupan srui lasr ke kasru yok lun God nu sesr pengana len.
Mwe read uh ma ke Jesus el akkeyela mwet 10 liki musen leper. Mas se inge in pacl sac, yok sensenkinya. Na oru mwet nukewa ma weack mas se inge enenu in sriyukla liki an ma inkaiyen mwetu muta we uh. Pa sikyak ke mwe read se inge.
Tu oana kalem uh, fahk lah ke Jesus el fahsr apkuranyang nu yorolos elos ngisre Jesus elan akkeyaclosla liki mas lalos. Oana pacl nukewa, Jesus el long enenu lalos ac fahk elos in som akkalemye nu sin mwet Tol in pacl sac oana akwuk lalos uh. (Leviticus 14). Elos oru oana, ac elos akilacnack lah elos kwela.
Jesus el akkeyaclah mwet 10, a sie fanna selos folok ac fahk kulo. Yok srui lal in akilen lah el kwela liki mas lal. God el finne tia tupan kut in fahk kulo nu sel ke kulang lal nu sesr, tu el ac insewowo in akilen nunak in srui lasr ke ma wowo puspus el oru wo nu sesr.
Mwet se inge tia musen leper mukwena a el oayapa sie mwet Samaria, su in pacl sac mwet uh pilesru. Ouinge, ke mwe lutlut se inge, Luke el srike elan akkalemye lah kulang lun God ma nu sin mwet nukewa.
