Kunokon
Sunday – June 25, 2017
Sifac: God El Ahkinsewowoye Mwet Nazerite Nuhnuhnkuh Se
Mwe Read: Mwet Nununku 13: 1-7
Ke sripen yok ma koluk lun tulik nutin Israel, pwanang Leum God El esaclosyang nu in poun mwet Philistia. Ke lusen year 40 elos pulakin keok ac kos lalos yurin mwet Philistia. Leum God El porongo tung lalos, ac akola in molelosla.
Samson, wen natul Manoah, ke sruf lal Dan, el sie sin Mwet Nuhnuhnkuh luhn mwet Israel, suc Leum God El srisrngiyac in molela mwet Israel liki mwet Philistia.
Meet liki Samson el isuslac, God El supala sie lupufan nu yurin papa ac ninac kiacl. Mwe read u akkalemye lah, ninac kiacl Samson el sie mutan ‘tahlahp’ kuh koflah in oasr tulihk nahtuh. Tusruktu, ke pacl se lipufan se inge sikyak nusel, el fwak mu, el ac tufwa oswelah sie wen.
Oasr akwuck ma ninac kiacl Samson enenuh in fwasr kac ke pacl in pitutuc lal. El tiac enenu in eis wain ku kutena mwe nihm kuh, el tiac enenuh in kang kutena mongo ma oal, ac ke pacl se tulik se inge isuslac, elan tiac kal aunsifacl.
God El sulellac Samson tu elan sie mwet Nazerite nusel. Oinge el tiac enenuh in nihm wain, ku kutena mwe nihm kuh, el tiac enenuh in kal aunsifacl, moul lal enenuh in arulana mutal, ac el tiac enenuh in pusral kutena mano misac kuh ma fokfok.
