Sifac lasr nuke Monday an tuku ke pulan pal se ma God el molela ac usla tulik nutin Israel liki kohs lalos fin an Egypt. God el orala masap 10 finol Sinai ac sang Moses elan tafela nu selos. Oinge Moses el tafeang nuselos ac sapkin tu elos in long akwoya, elos in mu etu ac akos masap inge kewa. 

Sie masap lun God inge pa in akmutalye len Sabath. Fahk mu, len onkosr (6) ke week se, kut in oru orekma lasr nukewa, tusruk len se ak itkosr an, kut in srelah nusin God ac tia oru kutena orekma. Verse 10-11 fahk oinge, “A len se akitkosr Sabbath lun Leum God lom. Nik kom oru kutena orekma – kom, ku wen nutum, ku acn nutum, ku mwet mukul kulansap lom, ku met mutan kulansap lom, ku kosro nutum, ku mwet sac lom suc muta in kalkal lom. Tuh in len onkosr Leum God El orala kusrao, facluh, ac meoa, ac ma nukewa loac, a mongla len se akitkosr, tuh ouinge Leum God E akinsewowoye len Sabbath, ac akmutalye,” 

Payena lah arulana fal me lutlut uh nu sesr misenge. Moul lasr misenge u ac pacl lasr misenge u, puslana ma sik, puslana ma kafofo, puslana elyah lasr kais sie sie. Orekma lasr pengana len ku kafofo lasr pengana len eslah pacl lasr nusin God. Panang oru falllacna me lutlut u in tuku in akkeye kut ac akasmakinye kut lah len se fanna ke week se, God el ke kut in srelah nu Sel. Len se fanna ke week se! El tia is ke tahfun week ku len luo, a len se fanna!

Lela me lutlut u in sang kasre kut suc ma enenu in srelah len se inge nusin God ac nga kulo kaksakin God ke moul lasr nukewa ac ke me lutlut wowo ma El acse nu sesr ke pal se inge