Kunokon
Monday November 14 2016
Sifac: Yihlac Ac Fah Kwelac
Mwe Read: 2 Togosra 5:10-14
Mwe read se ing akkalemye ke sie mwet kol fulat lun mwet meun lun Syria suc ma weauck leprosy. Mutal kulansap se lun mutan kial Naaman pa akkalemye nusel elan som suk mwet palu lun acn Israel. Mwe read se ing akkalemye lac Naaman sun loom sel Elisha mwet palu, an Elisha el fwa nusel elan som nu infacl Jordan yihlac kuh tihli pacl itkosr. Ke Naaman el long ma inge, el mutawauk in torkahskahs. El kisen siyucki al efu ke mwet palu sie tia tufoki sramsram nusel uh el supaclah sap soko nusel. Yohk tohrkahskahs lal ke ma inge.
Mutan kulansap se lal inge oyacpac akesmakinyelul ke mwe sap se lun mwet palu se inge. Naaman el longol ac som oru oana ke fwakyuckyang nusel. Ke sripen akosten lal, mwe read se inge akkalemye la el kwelac na paye. Manol fwel oan monun awowo se.
Nusesr kut in kalem kac lac, etu lasr mwet uh sufwal nuke etu lun God. Kut tia ku in use ma lun faclu in akfasrye lungse ac akwuck lun God. Funu Naamon el tia sismouk in long kahs in esmak sin mutan kulansap se inge nuke sal lun mwet palu, lukun el tiana pula in kwelac. Sap lun God uh pa yohk sripac uh. A tia ma lun faclu pa kut in srike in orekmakin in akfasrye ma lun God. Akos mwe sap ac kut e tufwa pula insewowo.
