Friday September 4 2015
Sifac: Wacngin Sie Sahyac
Mwe Read: Orekma 4: 1-12

Lipan Welly

Ma yohk ke book in Orekma: pa in fahkak lah ke kolyuk lun Ngun Mutal, mwet su fahsr tukun Jesus in pacl oemeet ah elos tuh fahkelik Pweng Wo ke Jesus in acn Jerusalem, ac in acn Judea nufon, oayapa Samaria, ac nu in mutunfacl nukewa fin faclu, Orekma 1:8.

Kut readi ke chapter sie lah ke lusan len angoul tukun Jesus El misa, el tuh sikyang nu selos paclna na pus in ouiya su liksreni na akpwayei lah pwaye El sifil moulyak 1:3. Ac ke El srakna muta yorolos, El fahk sap soko inge nuselos: “Nimet som liki acn Jerusalem, a kowos in soano na mwe kite se su nga tuh fahk nu suwos, su Papa El wulela kac 1:4.

Kut readi in chapter luo lah ke len in Pentecost, mwet lulalfongi nukewa fahsreni nu in acn sefanna 2:1. In pacl sacna sie pusra lulap kasla yen engyeng uh, oana pusren sie eng na upa, ac nwakla in lohm se elos muta loac ah nufon 2:2. Na elos liye kutu ma su oana luman loh ma firir, su fahsrelik ac tuhwi fin kais sie mwet in acn san 2:3. Elos nukewa sessesla ke Ngun Mutal ac mutawauk in kaskas ke kutena kain in kas, oana ke Ngun sang nu selos in fahk. Pa inge mutawaek iyacn Church (body of Christ). Kut etu la Jesus mukena pa LEUM GOD El sang nu sin Church tuh elan Leum fulat fin ma nukewa. Church pa monin Christ, ac ke sripen church, monin Christ fonla, oana ke ma nukewa yen nukewa fonla ke Christ, Ephesus 1: 22-23.

Ke chapter tolu Peter ac John akkeyelah sie mwet ul su nunna ul oe ke el isusla me ke mutunoa nu in Temple. Ac ke elos akilenak lah el pa mwet ul se ma muta ngusr ke Mutunoa Oasku ah, elos nukewa lut ac fwefela ke ma sikyak nu sel 3:10. Pa inge pacl se Peter el tuyak luti in Tempul uh.

Mwe lutlut se inge mutawaek ke Peter ac John srakna sramsram nu sin mwet uh ke kutu mwet tol, ac mwet se ma sifen mwet topang ke Tempul uh, ac kutu mwet Sadduce elos tuku v1. Elos toasr ke sripen mwet sap luo ah luti nu sin mwet uh lah Jesus el akmoulyeyukyak liki misa, mweyen ma inge akpwayeye lah mwet misa uh ac sifil moulyak v2.

Kut liye ke v3 lah elos sruu ac itukyang elos nu in presin. Akkalemyeyuk ke v4 lah pus sin mwet ma lohng luti laltal uh lulalfongi; ac pisen mwet ke u sac apkuran in sun tausin limekosr. Ke mwet kol lun mwet Jew ac un mwet matu ac mwet luti Ma Sap elos fahsreni nu Jerusalem v5, elos siyuk sin mwet sap luo ah “Ma ya ku se lomtal an, ku inen su komtal orekmakin in oru ma inge uh v7? Peter el sessesla ke Ngun Mutal ac topuk, lela kowos nukewa in etu, ac mwet Israel nukewa in etu pac, lah mwet se tu ye motowos inge el kwela na pwaye ke sripen ku lun inen Jesus Christ lun Nazareth, su kowos tuh uniya fin sakseng, ac su God El akmoulyauk liki misa v10.

Jesus pa Ma Simusla uh tuh kaskas kac, ma fahk mu, ‘Eot se ma kowos mwet musa uh pilesru Sikyak tuh pa yohk sripa oemeet uh v11. El mukena pa oasr ku lal in molela mwet uh. Fin faclu nufon, wangin sie ine saya su God El sang ku nu se in molikutla v12. Arulacna kalem ke mwe read se inge lah ku lun Ngun Mutal pa usel Peter el sang top na suwowos nu sin mwet kol inge. Wangin sensen lal ke sripen ma el witness kin ke len angoul ma Jesus El sikyang nu selos ac sifil pac ke elos nofon baptais yuklac ke Ngun Mutal ke len in Pentecost. Elos nofon akolla in kulansupu LEUM GOD in fahkak Gospel nu fin fwaclu nofon.

Kut e liye na misenge tuh kut tia ku in sifacna mukuikui ku kulansupu LEUM GOD efin wangin God Ngun Mutal in moul lasr. Kut eis fuka ku se Lun LEUM GOD ma Peter ac John orekmakin in sang topuk mwet kol fulat inge? Pa inge ku kut nofon enenu ke kulansap lasr Nusin God. Wangin ku lasr sifwana God Ngun Mutal mukena pa ku in akfasrye orekma Lal. Efin kut sang mwet in kol Church na e fah wangin ku ma Peter ac John orekma kin ke mwe lutlut se inge. Jesus mukena pa ku in kol Church Lal su tuku ke God Ngun Mutal mukena oana ke sim lac in Orekma 1:8. Sifil paing mwet nukewa ac srui kaksakin LEUM GOD ke moul wowo lasr kewa.