Friday July 10 2015
Sifac: Eteyuk Ke Fokin Orekma Lalos
Mwe Read: Matthew 7:15-20
 |
| Lipan Welly |
Sifil pac wi mwet nukewa in oru pac kaksak lasr nusin LEUM GOD Fulatlacna ke moul wowo lasr kewa. Nunak munas pray kesr nofon ke pacl nukewa tuh LEUM GOD lasr elan wi kut in pacl nukewa ke Kas in Kol Lal nusesr. El tia oana mwet luti Ma Sap uh; a El luti ke ku yohk ma oasr in El sifacna (Matt 7:29).
Meet liki orekla faclu, Kas El nuna oasr yurin God, ac El oapana God. Kas se inge El oasr yurin God meet liki mutaweyen faclu (John 1:1-2). Ma nukewa ma simlac in Bible natusr uh pah God. Efin kut nofon tia liye oana ke fahk se inge na e wangin Fokin Orekma Lasr uh. Bible natusr uh pah God su kut nofon etu tari lah El mukena pa e use moul ma pahtpaht uh. Efin kut tia sang nunak lasr ac insiasr nuke moul ma pahtpaht se inge in pacl nukewa na e wangin Fokin Orekma Lasr uh. Kut nofon efin tia ikacslah Ngun Mutal Elan pa oru orekma ku kulansap lasr uh na e wangin Fokin Orekma Lasr uh. LEUM GOD El enenu in tuku meet liki ma nukewa in pacl nukewa.
Mwe lutlut se inge luti nusesr lah Kas lun God efin wangin kuh sriklac etu lasr kac kut e putatyang nuke kikiap lun mwet palu in pacl nukewa. Liyekowosyang (v15) liki mwet palu kikiap. Elos ac tuku nu yuruwos oana luman sheep, a nunak lalos oana luman wolf lemnak. Elos e arulacna fakpap ke liye lasr uh tusruktu nunak kuh insielos oana kosro lemnak ma forofor in kuhnaoslah ma oan ke inkenek lalos. Sulahlel ac kikiap lalos elos srike in okanlah tusruktu fahko lalos sifacna fahkelos yahk na. Soko sak wo fah oswe fahko wo, ac soko sak koluk el ac oswe fahko koluk (v17). Soko sak wo koflana oswe fahko koluk, ac soko sak koluk tia ku in oswe fahko wo (v18). Wangin sie sesr ku in oswe fahko wo efin kut tia moul kin Kas lun God len nukewa ke moul lasr.
Ac Jesus El fahk nu sel, “Kom fah lungse LEUM GOD lom ke insiom kewa, ke ngunum kewa, ac ke nunkom kewa. Pa inge ma sap se ma yohk oemeet ac yohk sripa oemeet. Ma sap se akluo yohk sripa oapana ma se meet an: Kom fah lungse mwet tulan lom oana kom lungse kom sifacna (Matt 22:37-39). Arulacna kalem lah efa wangin sie pacl e oasr fahko ke orekma lasr uh efin kut tia moul kin ma sap se inge. Ma na kewa kut oru uh enenu in ma nu sin LEUM GOD. Kut nofon mwet lulalfongi uh kut oana Kas lun God kuh Bible se nusin mwet nukewa in loom sesr, sou lasr ku nuselos su tia muta ke moul in lulalfongi. Kut moul kin ma Kas lun God luti nusesr. Kut tia fahk mukena uh kut oru.
Lungse el mongfisrasr ac kulang; lungse el tia sok, lungse el tia sifacna konkin, el tia inse fulat; lungse el tia oru ma sufal, el tia nunku kacl sifacna, el tia sa in mulat, el tia oakla ma koluk orek nu sel. Lungse el tia engan ke ma koluk, a el engan ke ma pwaye. Lungse el tiana fuhleak; el lulalfongi ac finsrak ac muteng in pacl nukewa (1 Corinth 13:4-8). A fahko lun Ngun pa lungse engan, misla, mongfisrasr, kulang, orekma wo, oaru, pusisel, sifacna leum fac (Gal 5: 22).
Lungse pa yohk sripac emeet (Col 3:14). Efin kut tia moulkin lungse su pah oru LEUM GOD El supacma Wen sefanna natul in misac kesr nofon efa wangin fahko ke orekma lasr. Jesus El fahk nusin mwet tamul lutlut lahl lah mwet uh e Etacl ke sripen elos lungse sie sin sie. Lungse lasr uh e yohkelik in pacl nukewa efin kut tuku nu yurin LEUM God in pacl nukewa ac readi ac moul kin Kas Lahl. El mukena pah e use moul in lungse ac fahko lun Ngun Mutal nusesr. Mwe lutlut na wowo in sifil akesmakinye kut nofon lah kut nofon fototo lac ac LEUM GOD mukena pah ku in aksuwosye kut nofon: mwet nukewa orekma koluk, ac elos nukewa tia sun lupan wolana se ma God El akoo nu selos (Rom 3: 23). Sifil kaksakin LEUM GOD ke pacl na wowo lasr kewa ac paing mwet nukewa.
