Kunokon

Friday April 29 2016
Sifac: Moulkin Suwohswohs
Mwe Read: Psalm 101:1-4, 6, 7

Sifil srui yohk in wi mwet nukewa kaksakin LEUM GOD ke oakwuk wolacna Lal. Yohk liki ma nukewa ke lungse yohk Lal El supama Wen sefanna Natul Jesus Christ in moli kut lac. Paing mwet nukewa ac God bless.

Psalm soko inge mutawaek ke engan in onkakin oaru ac suwos lun LEUM GOD. Tokosra David el etu lah wangin suwos lun sie tokosra kuh sie mwet. El etu lah wangin suwoswos lal sifacna. Efin kut moulkin suwoswos kut enenu in sangen sin LEUM GOD emeet. Sangen sin LEUM GOD pa mutaweyen etauk. Etauk pa suwos! suh tuku yurin God mukena. Wangin sie mwet ku in kol mwet efin wangin sangen sin LEUM GOD yorol. Kalmen wangin sangen pa: lohsr! ac lohsr tia kuh in pwen lohsr. Misac mukena pa e tuku ke lohsr. Lohsr pa use sesuwos lasr kais sie. God El kwase lohsr ac sesuwos.

Mwe lutlut se inge tuku ke pacl fahl lun God ke sripen lung kulacng Lal. El sifil akesmakinye kut nukewa ke Suwos Lal. Nga fah tia misla ke kutena ma koluk. Nga kwase orekma lun mwet su forla liki God; ac fah wangin ip luk yorolos (v3). Nga fah tiana oru kutena ma sesuwos ac nga fah tia kupasr nu ke kutena ma koluk (v4). Enenu in pa inge wulela lun sie mwet kol ke sou, sie mwet kol ke government ac kuh ke Church. Srikeni lungse mweyen wangin sangen lasr yurin God. Kut suk na ma e wo nu sesr mukena, srikeni suwos ac yohkelik sesuwos.

Pa inge ma LEUM GOD El oakia nu sesr kewa kut in fahsr kac, Ma Sap Su Yohk Oemeet: Ac Jesus El fahk nu sel, “Kom fah lungse LEUM GOD lom ke insiom kewa, ke ngunum kewa, ac ke nunkom kewa. Pa ine ma sap se ma yohk oemeet ac yohk sripa oemeet. Ma sap se akluo yohk sripa oapana ma se meet an: ‘Kom fah lungse mwet tulan lom oana kom lungse kom sifacna. Ma sap nukewa lal Moses ac mwe luti nukewa lun mwet palu oan ye ma sap luo inge (Matt 22:37-40). Suwoswos Lun LEUM GOD tuku ke verse se inge, efin kut moulkin ke insiesr kewa ma nukewa kut oru e suwos.

Lungse el mongfisrasr ac kulang; lungse el tia sok, lungse el tia sifacna konkon, el tia inse fulat; lungse el tia oru ma sufal, el tia nunku kacl sifacna, el tia sa in mulat, el tia oakla ma koluk orek nu sel. Lungse el tia engan ke ma koluk, a el engan ke ma pwaye. Lungse el tiacna fuhleak; el lulalfongi ac finsrak ac muteng in pacl nukewa. Lungse el tiana wanginla. A funu ke kas in palu, ma nu ke kitin pacl; ac mwe sang in kaskas ke sie na kain pusra ac fah tui; ac etauk ac fah wanginla pac (1 Corinth 13:4-8).

Kas Lun LEUM GOD mukena pa oasr suwos kac uh. Efin kut tia tuku na Yurin God ac eis ke Kahs Lal in pacl nukewa, kut kuh in fahk muh sriklac suwos ac yohk lohsr. Jesus Christ El tuku in use kalem nu faclu nofon. Bible natusr uh efin kut tia ikaslah readi kuh lohng ke mwe lutlut kac inge na e wangin inkenak suwos yorosr. Inkenak soko fanna pa e use moul ma patpat nusesr kewa pa: forlah liki ma koluk lasr ac lulalfongi ke misa ac moulyak lal Jesus Christ.

Pa inge lungse yohk Lun God uh. El ke kut nukewa in eis moul ma patpat. Efin kut tia moulkin lungse se Lun God inge na wangin suwos yorosr. Kut tia ku in kol mwet lasr efin wangin suwos oana ke tokosra David el oankakin inge. Mwe asor nu sin mutanfacl se kuh sou se efin elos tia suk ke LEUM GOD. Wangin mwet kikiap fah muta ke inkul fulat sik; wangin mwet kutasrik fah muta yurik (v7). Wangin ma kuh in wiklac Yurin God. El liye suwos ac sesuwos lasr kais sie in pacl nukewa. Suk in pacl nukewa in akfulatye LEUM GOD ke moul suwos ac lungse nu sin sie sin sie ac yohk nu sin God. Sifil srui in wi mwet nukewa in kaksakin LEUM GOD ke akwuk suwoswos Lal. Paing mwet nukewa ac God bless!