Friday December 11 2015
Sifac: Mwe Kisac Ke Luhlahlfongi
Mwe Raed: Hebrew 11:4-16

Lipan Welly

Sifil wi mwet nukewa in kaksakin LEUM GOD lasr ke lungse kawil Lal su El akkalemye ke Wen Sefanna Natul. Jesus Christ, El mukena pa kut enenu in akfulactye ac lulalfongi in moul lasr. Paing mwet nukewa ke pacl se inge ac lela tuh God Ngun Mutal Elan kol kut ke Kahs in Kol Lal nu sesr kais sie. Merry Christmas ac Happy New Year nu sin mwet nukewa.

Leta se nu sin mwet Hebrew inge tuh simla nu sin sie un mwet Christian su yokyokelik alein nu selos, pwanang oasr sensen mu elos ac fuhleak lulalfongi lalos. Mwet se ma simusla leta se inge tuh srike in akkeyalos ke lulalfongi lalos, ke ma inge el fahkak lah Jesus Christ pa fahkak safla ke luman God, ac el mukena pa fahkulak pwaye (Tukakinyen Leta Nu Sin Mwet Hebrew).

Mwe lutlut se inge sramsram kin kutu mwet matu lasr meet ah ke lulalfongi yohk lalos ke LEUM GOD. Kalmen lulalfongi pa kuht etu suwohs ke ma su kut finsrak nu kac, ac oasr mwe akpwayeye lasr ke ma su kut tiac ku in liye (Heb 11:1). Ke sripen lulalfongi lun mwet matu lasr meet ah, God El insewowo kaclos (Heb 11:2). Misenge kut ku in oana mwet matu lasr meet ah ac eis mwe insewowo yurin LEUM GOD ke lulalfongi lasr in El mukena.

Ke sripen lulalfongi lal, Abel el tuh oru sie mwe kisa nu sin God su wo liki mwe kisa lal Cain. Ke sripen lulalfongi lal, God El insewowo sel ac oakalla mu el sie mwet suwoswos, mweyen God El insewowo ke mwe sang lal ah. Ke sripen lulalfongi lal, Abel el ne misa, ma el oru uh srakna kaskas nu sesr (Heb 11:4).

Ke sripen lulalfongi lal Enoch, oru el tia pula misa, a utukyak el nu yurin GOD. Wangin mwet ku in konalak, mweyen God El usaclack nu lung. Ma Simusla uh fahk mu meet liki utukyak Enoch nu lucng, el tuh akinsewowo God (Heb 11:5).Wangin mwet ku in akinsewowoye God fin wangin lulalfongi lalos. Tuh kutena mwet su tuku in alu nu sin God, el enenu in lulalfongi lah pwaye oasr God moul se, ac El oru wo nu selos su sokol (Heb 11:6).

Lulalfongi lal Noah pa oru elan lohng kas in sensenkakin lun God nu sel ke ma ac tuku tok, su el tia ku in liye. El akos God ac orala oak soko, su el ac sou lal moulla kac. Ke sripen ma el oru inge, Noah el akkalemye lah faclu koluk, ac el pa sie su aksuwosyeyuk yurin God ke sripen lulalfongi lal (Heb 11:7).

Lulalfongi lal Abraham pa oru el akos ke God El tuh panglol elan som nu in sie facl su God El tuh wuleacng mu El ac sang nu sel. El tuh som liki facl sel ac tia etu lah el ac som nu ya (Heb 11:8). Lulalfongi lal Abraham pa oru elan tuh ekla papa se el finne arulacna matuoh, ac Sarah el mutan talap se. El tuh lulalfongi God lah El ac oru ma El wulela kac (Heb 11:11)

Mwet inge nukewa lulalfongi nwe ke na elos misa, a elos tiana eis ma God El wulela kac (Heb 11:13a). Verse se inge sifil akkesmakinye kut mwet lulalfongi uh lah kut mwet fahsr nu facluh se inge, ac LEUM GOD El akolla tari acn nu sin mwet nukewa su lulalfongi in Wen Sefanna Natul, Jesus Christ. God El lungse mwet nukewa in lulalfongi in Wen natul Jesus Christ ac eis moul ma patpat.

Me lutlut se inge sifil tuku in luti kut ke lulafongi lasr uh. Kut in tiac fuleak ac kut in wi lutlut ke mwet lulalfongi matu lasr ke Bible natusr uh. Elos finne tiac liye mah oasr met uh, elos tia tui in lulafongi na ke LEUM GOD ac akos ma El fahk nuselos. Sifil akkesmakinye kut lah kut nukewa akwot nuke moul ma patpat su El akoo nusin mwet lulalfongi nukewa. Sifil srui kaksakin LEUM GOD ke mwe lutlut El use nusesr nukewa kut in tia tui in sang nukewa lulalfongi lasr nusin Wen Sefanna Natul Jesus Christ su pa inkacnek soko fanna nuke moul ma patpat. Sifil paing mwet nukewa ac God Bless.